ஸ்ரீ ராமஜயம்
எல்லாம் அவனே
காலையும் நீயே மாலையும் நீயே காற்றும் நீயே கனலும் நீயே
கடலும் நீயே ஆகாயமும் நீயே பூமியுமாய் ஆதாரமானாயே
அலைகடலாய் பரந்தெங்கும் புரண்டு அலைமகளை மார்பில்
அலங்கரித்து அர்ச்சாவதாரமாய் அவனியில் ஆர்ப்பரித்தாயே
ஆணாய் பெண்ணாய் அலியாய் அதுவுமிதுமாய் எதுவுமாய்
ஆதியாய் அந்தமாய் அனைத்திலும் அந்தர்யாமியாய் ஆனாயே
ஓங்காரமான ஒன்றாய் இலக்குமியுடன் இரண்டாய் மும்மூர்த்திகளில்
முதல்வனாய் நால்வேதமாய் பஞ்சபூதங்களை ஆள்வாயே
அறுசுவையாய் நறுமணமாய் சப்தஸ்வரமாய் எழேழுலகத்திலும்
எண்திசையிலும் எப்பொழுதும் எல்லாமும் எய்வாயே
அங்கிங்கெனாதபடி அனைத்தையும் கடந்து உள்ளிருந்து
இல்லையை இல்லை செய்தாயே
அரக்கனுக்கு அரசையீன்று ஆனையை காத்து பறவையை வைகுந்தத்தேத்தி
அனைத்தையும் அனுக்ரஹிக்கும் கற்பகம் ஆனாயே
பரியாய் வேதத்தை உபதேசித்து மீனாய் அதைக்காத்து ராமனாய்
அதன்வழி நடந்து கண்ணனாய் கீதையை உரைத்தாயே
அவதாரங்களால் அறிவுரைத்தும் அஞ்ஞானிகளாயிருக்கிறோம்
அருள் கூர்ந்து குறையில்லா வாழ்வளிப்பாயே
நரசிம்மன்
No comments:
Post a Comment